Көч җитмәсә, хәйлә бар

Моны күреп калган  юл хәвефсезлеге инспекторы шундук таягын күтәреп туктатты һәм саф рус телендә честь бирде:

 – Исәнмесез! Инспектор лейтенант Петров. Машина таныклыгын күрсәтегез! Ни өчен юл кагыйдәсен боздыгыз?

 Вәсил хәйләләшергә уйлады. Инспектор рус милләтеннән булганга, арткы утыргычтагы ике-өч яшьлек сабыена ишетерлек итеп татарча:

 – Тик кенә утыр. Сораса, эчем авырта, сукыр эчәгем шартлаган диярсең, диде.

 – Иптәш лейтенант! Монда чрезвычайный ситуация, –  дип, каушавыннан урыс-татар сүзләрен бергә буташтырып акланырга кереште: – Беләсезме, у моего малыша слепая кишка лопнула. Шевелиться не мужыт. Больница спешу. Җибәрегез, ә?..

 Шулчак һич көтмәгәндә инспектор сабыйга борылды да, саф татарчага күчеп: – Эшләр шәпме? – дип сорады тегеннән, күз кысып.

 – Шәп, – дип җаваплады сабый, үзенә игътибар бүлүче табылуга сөенеп һәм утыргычка басып шатлыгыннан сикерә дә башлады.

 Транспорт хуҗасының хәйләләшүен күргән инспектор үзе дә хәйлә белән җавап кайтарырга булды:

 – Әтиеңнең кайсы җире авырта?

 – Эче шалтлаган...

 – Мул итеп штраф бирсәк, эче төзәлмәс микән?

 – Төзәлел, күп итеп билсәк...

 Инспектор протокол тутырды.

 – Юл кагыйдәләрен тупас бозган өчен йөз сум күләмендә штраф салына Сезгә, алдакчы гражданин водитель. Тиешле сумманы түләп, квитанцияне алыгыз!

 – Иптәш лейтенант! Каян шул тиклем саф татарча сөйләшергә өйрәндегез? – гаҗәпләнгән Вәсилнең ис-акылы китте.

 – Фамилиям – Петров, үзем керәшен татары булам, – дип елмаеп честь биреп калды инспектор.

Камил Фазлый.