Чираттагы чүплек

Бу элегрәк булса бер хәл, ә хәзер бар ил мондый башбаштакларга каршы көрәшә бит! Урамнарыбызга да уңайлы булсын дип чүп салу контейнерлары урнаштырылды ич.

Минем моның кем эше икәнлеген ачыклап торырга вакытым булмады – икенче көнне үк гаиләм белән Бәләбәйгә кайтып киттек. Әмма халыкта юкка гына: “Без капчыкта ятмый”, – димиләр. Без дә, һичшиксез, тирә-як мохитне пычратучы шушы явызны ачыклаячакбыз.

Мин авылым патриоты буларак та, журналист буларак та читтә кала алмыйм. Гәзит укучылар да бу изге эштә миңа булышырлар – “Бәләбәй хәбәрләренә” телефоннан шылтыратып ( 3-17-02 ) явызның исем-фамилиясен атарлар дип ышанам.

Авылым уртасына чүп ташлаучыны, әлбәттә, ачыклаячакбыз һәм аның кем булуына карамастан, эшне прокуратурага тапшырачакбыз.

Алдагы саннарның берсендә бу кешенең исем-фамилиясен атаячакбыз һәм аңа нинди җәза бирелүе турында язачакбыз.

Габдулла Вафин.