Әзерлек җентекләп тикшерелә

Биналар һәм территорияләрнең санитар торышы, җылыту һәм су белән тәэмин итү системалары эше, азык-төлек блоклары һәм спорт залларының әзерлеге җентекләп  тикшерелә.  Янгын сүндерү һәм террорчылыкка каршы хәвефсезлек  аерым карала – монда компромисслар булырга мөмкин түгел. Комиссиянең күз уңында  – 47 мәгариф оешмасы. Тикшерүчеләр составында – мәгариф идарәсе, хакимитят, күзәтчелек хезмәтләре һәм хокук саклау органнары вәкилләре.

Газетабыз  хәбәрчеләре комиссия белән бергә берничә учреждениедә булдылар.  Маршрут нокталарының берсе – Татар гимназиясе. Монда төп эшләр алда әле, әмма кайбер эшләр инде эшләнгән. Директор Эльвира Хәкимуллина сүзләренә караганда, гимназия урындагы башлангычларны  хуплау программасында җиңгән: 1 сентябрьгә кадәр биредә 43 тәрәзә блогы алыштырылачак  – моңа 2 млн сумга якын акча китәчәк. Моннан тыш, янгын күзәтчелеге таләбе буенча стеналарны ремонтлаганнар һәм санузеллардагы раковиналарны алыштырганнар.

Мәгариф идарәсенең ОБЖ бүлеге җитәкчесе Назим Кадыйров гимназиянең спорт мәйданчыгын билгеләп үтте – аның торышын үрнәкле, диде. Мәйданчыкта тәртип физкультура укытучысы Азат Гомәровның даими игътибар үзәгендә: аның өчен мәйданның матур гына түгел, хәвефсез булуы да мөһим.

Бәләбәй медицина көллиятендә дә кабул итүгә ныклап әзерләнүләре сизелеп тора. Бинада һәм территориядә тәртип: түшәмнәр һәм стеналар буялган, барысы да юылган. Директор Радмир Хәйруллин яңа компьютерлар һәм ноутбуклар торган ике кабинетны күрсәтте. Берничә аудиториядә яңа парталар барлыкка килгән. Комиссия билгеләп үткәнчә, иске корылмалар, җиһазлар да яхшы  сакланган.

"Татар гимназиясе һәм медицина көллияте коллективлары эшчәнлегеннән канәгать. Укытучылар һәм хезмәткәрләр чыннан да тырышалар, учреждениеләрне уку елы башына әзерләүне дәвам итәләр. Комиссия объектларның бер өлешен бәяләде инде, һәм әлегә җитди шелтәләр юк", – дип йомгак ясады Мәгариф идарәсе җитәкчесе урынбасары Лилия Дутова.

Ә алда эшләр күп әле – 1 сентябрьгә кадәр барлык эшләрне төгәлләп өлгерергә кирәк. Әмма хәзер үк күренеп тора: Бәләбәй районы мәгариф учреждениеләрендә балалар һәм педагоглар өчен яңа уку елы тыныч һәм уңайлы башлансын өчен барысын да эшлиләр.

Регина Иванова

Автор һәм Елена Петрова фотолары