Ашыгыч рәвештә яшь авторлар таләп ителә!

Башкорт әдәбияты күренекле шагыйрьләре, прозаиклар һәм драматурглары белән билгеле. Мостай Кәрим, Зәйнәп Биишева, Степан Злобин һәм башка күп авторларның әсәрләре чит телләргә тәрҗемә ителгән, төрле илләрдә популяр.

Гыйнвар башында республика Язучылар союзының башкорт язучыларының яшь алмашын үстерүгә юнәлтелгән проекты – Башкортстанның әдәби мәктәбе – старт алды. Ул Русия Федерациясе Президенты грантына гамәлгә ашырыла.

Башкортстан Язучылар союзы рәисе Зәки Алибаев фаразлавынча, проектка бөтен республикадан, шулай ук Русиянең башкортлар яшәгән башка төбәкләрендә яшәгән яшь авторлардан меңгә якын эш кабул ителәчәк.

– Без яшьләрне активлаштырырга телибез. Әгәр талантлы язучыларны тапсак, аларга һәртөрле ярдәм күрсәтәчәкбез. “Башинформ” агентлыгы хәбәр итүенчә, проектта 14тән 25 яшькәчә, төрле жанрларда язучы (шигырьләр, хикәяләр, повестьлар) яшь авторлар катнаша ала. Катнашу өчен “Литература Башкортостана” төркемендә бирелгән заявканы тутырырга һәм электрон адреска җибәрергә кирәк ([email protected]). Авторларның башкорт, рус һәм татар телләрендәге кулъязмаларына остазлар – республиканың билгеле язучылары һәм шагыйрьләре бәя бирәчәк. Катнашучылар төбәкнең әдәби басмалары битләрендә һәм Башкортстан Республикасы Язучылар союзының рәсми төркемендә чыгыш ясаячак, осталык классларында, семинарларда, вебинарлар, видеоконференцияләрдә катнашачак. Остазлар аларга иҗат серләрен өйрәтәчәк. Проектның 30 финалчысы – иң талантлы яшь авторлар – Уфага бүләкләү өчен чакырылачак.

Проектның рәсми эмблемасы да расланган. Эмблеманың авторы – кинорежиссер һәм фоторәссам Фәрзәнә Үтәрбаева.

“Әдәби мәктәп” финалистларының әсәрләрен туплап, җыентык чыгару фаразлана. Иң яхшы кулъязмалар авторларына З. Биишева исемендәге “Китап” нәшриятында китапларын чыгару мөмкинлеге биреләчәк.

Гөлнара Мурзина