Мәктәпнең 100 еллыгына – яңа тәрәзәләр!

Мәтәүбаш авыл советы авыл биләмәсендә Урындагы башлангычларга ярдәм программасында катнашуга багышланган җыелышка Мәтәүбашта гына түгел, Аккаен һәм Акбасарда яшәүчеләр дә килде. Ә башкача ничек булсын! Авыл биләмәсенең мөһим проблемаларын чишү юлларын бергә киңәшләшеп кенә табарга мөмкин ич. Халык конкурста катнашуның тормышны тагын да уңайлырак итәргә мөмкин икәнен яхшы аңлый.

– ППМИ-2019 конкурсында катнашу өчен күпчелек тавыш белән мәктәп тәрәзәләрен алыштыру буенча проект сайланды. Кышка кергәнче аларны җылытсак та, кабинетларда салкынча. Бу белем бирү учреждениесендә санитар-эпидемиологик минимум белән билгеләнгән температура режимы таләпләрен үтәүдә кыенлыклар тудыра. Яңа тәрәзәләр кую мәктәпне заманча итәчәк, укучыларны укыту өчен уңайлы мохит тудырачак, – дип язды редакциягә Мәтәүбаш мәктәбе укытучысы Гөлнара Зәйруллина.

Яшь мәтәүбашлыларның әйткәннәре дә проектның көнүзәклеген раслый. ППМИ-2019 темасына арналган рәсемнәрне алар “Өлкәннәр, безне яклагыз! Ә без яхшы укуыбыз һәм изге гамәлләребез белән бу проектка лаек икәнне расларбыз” дигән сүзләр белән ныгытып та куйганнар.

Мәтәүбашлылар аларның башлангычын конкурс комиссияс е хуплар дип ышаналар, чөнки киләсе елда мәктәп 100 еллыгын билгеләячәк. Бер гасырлык юбилейга яңа тәрәзәләр шәп бүләк булчак!

Римма Солтанова әзерләде.