Прагада Сабантуй бәйрәме узды

8 июнь Прагада Сабантуе узды. Милли бәйрәм Чехия башкаласында инде унҗиденче тапкыр оештырылды. Балалар да, өлкәннәр дә рәхәтләнеп күңел ачты.

Милли уеннар белән бергә күмәкләшеп җырлау да Сабантуйның матур гадәтләренең берсе. Иң беренче булып җыелган халык "Туган тел"не җырлады. Килгән кунаклар арасында татарлар гына булмау сәбәпле, җырның сүзләре кәгазьгә бастырылган килеш таратылды.

Ел саен Прага Сабан туена татарлардан тыш, азәрбайҗаннар, үзбәкләр, казакълар, чехлар, урыслар һәм башка милләт вәкилләре катнаша. Соңгы елларда Прага Сабан туена Чехиядә яшәгән төрекләр дә килә, быел да кунаклар арасында Төркия илчелеге вәкиле булды.

Бәйрәм кичке бишкә кадәр дәвам итте. Әле аннан соң да күпләр өйләренә ашыкмыйча аралашып утырды.

Азатлык радиосы материалы буенча.