Армия генералы Мәхмүт Гәрәев вафат

Бу хакта Татарстанның Русиядәге Тулы вәкаләтле вәкиллеге хәбәр итә.

Аңа 96 яшь иде.

Кайгылы хәбәрне Татарстанның Русиядәге Тулы вәкаләтле вәкиллегенә Мәхмүт Гәрәев гаиләсе җиткерде.

«Олы яшьтә булуына карамастан, ул соңгы көнгә кадәр сафта калды. Зирәк акыл, көнләшерлек хәтер һәм юмор хисенә ия иде. Русия Оборона министрлыгы коллегиясенә килергә әзерләнде. Тик өлгермәде…» — диелгән хәбәрдә.

Хушлашу һәм җеназа үткәрү датасы, урыны турында өстәмә хәбәр ителәчәк.

Мәхмүт Гәрәев алты сугышта катнашкан. 1941 елның ноябрендә Мәскәү янындагы көрәштә хәрби чирканчык ала, 18 яшендә батальон белән командалык итә. Генерал Гәрәев 20 елдан артык хәрби фәннәр академиясен җитәкләде.

Ул Сугыш һәм Хәтер белән бәйле барлык гамәлләрнең эмоциональ үзәге булды. Төрле халыкара һәм бөтенрусия конференцияләрдә актив катнашты.

Мәхмүт Гәрәев ике дистә китап, йөзләгән фәнни эш һәм мәкалә язды — алар барысы да илнең оборона көченә багышланган. Тарихны яңадан язарга тырышучыларга каршы торды.

Генерал Гәрәев герой-шагыйрь Муса Җәлил исемен кайтару өчен дә күп эш башкарды. Нәкъ менә аның немец коллегалары ярдәме белән кулга алу һәм җәзалау турындагы Гитлер командованиесенең боерыклары табылган. Хәзер Җәлилнең батырлыгы документаль рәвештә расланды.

«Татарстан Республикасының Русия Федерациясендәге Тулы вәкаләтле вәкиллеге Мәхмүт Әхмәт улының туганнары һәм якыннарының тирән кайгысын уртаклаша», диелгән хәбәрдә.

“Татар-информ” мәгълүмат агентлыгы.

Габдулла Вафин әзерләде.