Мишустин яңа коронавирусны, ВИЧ белән беррәттән, куркыныч авырулар исемлегенә кертте

2019-nCoV коронавирус инфекциясе әйләнә-тирәдәгеләргә куркыныч тудыра торган авырулар исемлегенә кертелде. РФ Хөкүмәте Рәисе Михаил Мишустин шул хактагы карарны имзалады.

«Әйләнә-тирәдәгеләргә куркыныч тудыра торган авырулар исемлеген мондый эчтәлектәге («16. В 34.2 коронавирус инфекциясе (2019-nCoV)) 16нчы пункт белән тулыландырырга», - диелә Хөкүмәт сайтында дөнья күргән документта.

Әлеге исемлек 2004 елда төзелгән һәм шуннан соң үзгәреш кичермәгән иде. Анда 15 төрдәге авыру (ВИЧ, бизгәк, туберкулез, түләмә, ваба, чума һ.б.) керә.

«Татар-информ» агентлыгы коронавирус аркасында 130 россияленең ашыгыч рәвештә Хубэй провинциясеннән китәргә ниятләве хакында хәбәр иткән иде инде. Моннан тыш, Русия 1 февральдән Кытай белән авиаэлемтәне чикләде.

“Татар-информ” мәгълүмат агентлыгы.

Габдулла Вафин әзерләде.