Башкортстан башлыгы Тазалык көннәрен үткәрү турындагы указга кул куйды

Документка ярашлы, район һәм шәһәр хакимиятләренә кимендә аена ике тапкыр Тазалык көннәрен үткәрергә тәкъдим ителә. Шушы көннәрдә каралган эшләр исемлегендә – предприятиеләр, оешмалар катнашлыгында ихаталарны, урамнарны, паркларны һәм башка биләмәләрне төзекләндерү һәм тазарту.

Махсуслашкан оешмалар юл буйларындагы ауган агачларны, чүп-чарны җыеп алырга тиеш.

Ел саен 1 апрельгә тиклем муниципалитетләр Тазалык көннәрен үткәрү буенча чаралар планын кабул итәргә һәм Башкортстанның Торлак-коммуналь хуҗалык министрлыгына тапшырырга бурычлы.

«Без берничә муниципалитетнең, тәү чиратта, Учалы һәм Әлшәй районнарының тәҗрибәсен өйрәндек. Анда һәр предприятие үзләренә беркетелгән биләмәне җыештыру өчен бер сәгатькә кешеләр бүлә, — дип белдерде Радий Хәбиров хөкүмәттәге киңәшмәдә. — Мәсәлән, Учалы – бик таза шәһәр. Шуңа без шушы тәҗрибәне бөтен республикага таратырга булдык. Мин моңа зур игътибар бүләм».

Республикада тәүге тазалык көннәре киләсе атнада ук башлана – 18 марттан 20сенә тиклем. Шул ук вакытта кардан тазарту эше башкарыла, 16 марттан санитар җыештыру һәм биләмәләрне яшелләндерү башлана.

Зәвыклы биләмәләр елы барышында өч республика өмәсен (18 апрельдә, 4 июльдә һәм 3 октябрьдә), шулай ук 16 Тазалык көнен, ике «Яшел Башкортстан» республика акциясен һәм 2 майда Искә алу һәм ихтирам көне үткәрү планлаштырыла.

Оксана Алексеева әзерләде