“Чисталык көннәре” безне куандырды

Ленин урамындагы мәйданчыкка авыр техника эшләгәннән соң торып калган карны чистартырга күтәренке кәеф белән, көрәкләр күтәреп “Керамика” җәмгыяте вәкилләре чыкты.

– Шәһәрне кыш буе җыелган кар һәм чүп-чардан чистартырга кирәк инде, – диде предприятиенең техник чаралар буенча саклану инспекторы Ольга Надолько. – Бар да яхшы, эшебез җырлап бара, тик кешеләр куеп киткән җиңел автомобильләр генә кыенлык тудыра – тракторларыбызга кар чистартырга комачаулый. Әмма без төшенкелеккә бирелмибез – көрәкләребезне эшкә җигәбез.

Мәдәният хезмәткәрләре дә “Керамика” җәмгыятеннән калышмадылар – үзләренә бүлеп бирелгән мәйданчыкта шау-гөр килеп тәртип урнаштырдылар.

– Көрәкләр дә, теләк тә бар, без – шәһәрнең йөзе, – дип елмайды “Урал-Батыр” мәдәният үзәгенең хуҗалык эшләре буенча җитәкчесе Эльвира Суфиянова. – Безнең: “Чиста шәһәр өчен”, – дигән девизыбыз да бар.

“Бәләбәй коммуналчысы” җәмгыятенең “авыр артиллериясе” дә “чисталык көненнән” читтә калмады – алар җилкәсенә тонналаган карны шәһәр читенә чыгару төште.

Илья Букарев