Федераль медицина-биологик агентлыгы: Русиядә коронавирус эпидемиясе җәйгә чигенәчәк

Русиядә коронавирус эпидемиясе җәйгә чигенәчәк, дип белдерде Федераль медицина-биологик агентлыгының баш инфекционисты Владимир Никифоров «Беренче канал» эфирында.

«Аның җәй көне бетәчәген кистереп әйтергә мөмкин», - диде Никифоров.

Белгеч сүзләренчә, Русиядә авыру таралышының иң югары ноктасы әле үтелмәгән. Ул киләсе атна урталарына туры киләчәк, ди эксперт.

Covid-19 коронавирусы кискен тын юллары вирус инфекциясенә карый, дип искәртте Федераль медицина-биологик агентлыгының баш инфекционисты. Гадәттә, мондый вируслы авыруларның «гомере» 10-12 атна дәвам итә.

«Татар-информ» агентлыгы Русия галимнәренең коронавирусны юк итү алымын уйлап табуы хакында хәбәр иткән иде инде.

«Татар-информ» мәгълүмат агентлыгы.

Габдулла Вафин әзерләде.