Русия Финанслар министрлыгы төбәкләргә ярдәмгә 100 млрд сум акча күчерде

Русия Финанслар министрлыгы керемнәре кимүне компенсацияләү өчен төбәкләргә 100 млрд сум акча күчерде. Бу хакта ведомство сайтында хәбәр ителә.

«Акча 2020 елның 1 маена салым һәм салым булмаган керемнәре алдагы ике елдагы керемнәреннән кимрәк булган субъектларга юнәлдереләчәк», - диелә хәбәрдә.

Ярдәм күләме региональ бюджетларның кичектергесез чыгымнарын финанслау кирәклеген исәпкә алып билгеләнә. Биредә Covid-19 таралу сәбәпле, икътисади вазгыять начарлану күздә тотыла.

Бу чара Covid-19 таралу сәбәпле, икътисади хәл начарайган шартларда Русия субъектлары бюджетларын балансларга ярдәм итәчәк, дип саныйлар ведомствода.

«Татар-информ» мәгълүмат агентлыгы.

Габдулла Вафин әзерләде.