Яраткан парк чисталыгы өчен!

Бирегә килгән халык рәхәтләнеп ял итсен, бернәрсә дә аларның күңелен кырмасын өчен Мәдәният сарае хезмәткәрләре көн саен тир түгә: парк һәм аңа терәлеп торган Мемориаль комплекс зонасын, бию һәм балалар уен мәйданчыгын чүп-чардан тазарта, эскәмияләрне дезинфекция чаралары белән эшкәртә. Җыелган чүп көн дә түгеп барыла, ә газоннарны баскан үлән җәй буена берничә тапкыр чабып алынган. Ә инде тирә-якны бизәп чәчкә атучы чагу ләлаләр, лилияләр, нәркисләр, ак чәчкәләр, хризантемалар – Приют поселогы Ветераннар советы әгъзаларының хезмәт җимеше.

Кайчан гына карама, паркта кеше күп була: бала-чаганың күңелле шау-шуы, олы яшьтәге кешеләрнең тын гына гапләшүе… Тик менә кайбер кешеләрнең тәрбиясезлеге – үз артыннан теләсә кайда чүп-чар калдырып китү гадәте генә күңелне кыра. Чүп савытлары да тора, югыйсә… Андый кешеләргә тагын бер тапкыр: “Пычратмасаң, чиста була ул!” – дип искәртү ясыйсы килә. Яраткан Дан паркы безне – прютлыларны да, килгән кунакларны да чисталыгы һәм пөхтәлеге белән сөендерсен иде дигән теләктә калабыз.

Ольга Тимофеева,

Мәдәният сараеның әйдәп баручы методисты, Приют поселогы.