Гидрометеоүзәктә Идел буе округында -4 градуска кадәр кырау төшәчәген фаразладылар

Дүшәмбедән чәршәмбегә кадәр Идел буе федераль округында көннәрнең кисәк суытуы көтелә. Бу хакта РИА Новости агентлыгы Гидрометеоүзәкнең фәнни җитәкчесе Роман Вильфандка сылтама белән хәбәр итә.

7-9 сентябрьдә Идел буе федераль округында -2 градустан -4 градуска кадәр кырау көтелә.

Моннан тыш, бүгенге көн Русиянең үзәк өлеше өчен бу атнада иң соңгы җылы көн булачак. Алга таба әлеге территориядә атна ахырына сизелерлек суытып, һава температурасы +10..+15 градус кына тәшкил итәчәк.

«Европа территориясенең көньягында эссе (+30 градустан югары), хәтта җәйге һава торышы дәвам итә, әмма Краснодар краенда һәм Ростов өлкәсендә интенсив явым-төшем күзәтеләчәк. Кара диңгез буенда да шундый һава торышы хакимлек итәчәк», - диде Вильфанд.

«Татар-информ» мәгълүмат агентлыгы.

Габдулла Вафин әзерләде.