Бәләбәйнең “Скандинавия әбиләре"

Монда шәһәребезнең иң актив һәм иң тату пенсионерлары җыелганнар иде. Ә аларның барсын да бер яраткан шөгыль – скандинавия йөреше берләштерә иде.

Өлкәннәр быелгы елны бик актив үткәрделәр. Ә әлеге җыелыш – шуның йомгагы иде. Алар саф һавада дәртле музыка астында төрле күнегүләр ясадылар, кызыклы бәйгеләр үткәрделәр. Өлкәннәрнең хәтта үз командалары да бар иде – “Пионерлар, алга!”, “Тиктормаслар”, “Салават күпере”.

Тамашаны социаль хезмәт күрсәтү үзәге “Хәрәкәтләнү һәм аралашу” программасы кысаларында оештырган иде. Проектның уңай яклары бик күп. Иң мөһиме – программа пенсия яшендәге кешеләргә скандинавия йөреше, фитнес, йөзү төркемнәрендә бушлай шөгыльләнергә мөмкинчелек бирә. Ә бу исә күтәренке кәеф һәм яхшы сәламәтлек дигән сүз.

Актив тормыш алып баручы шушы төркемгә йөрүчеләрнең саны илледән артык. Яшьләре дә төрлечә – 60тан 80гә кадәр.

Бу күңелле җыенга кунаклар да чакырылган иде. “Хәрәкәт һәм аралашу” проектын хуплаганнары өчен “Чемпион” спорт сарае, “Урал батыр” милли-мәдәни үзәге, “Бәләбәй хәбәрләре” иҗтимагый-сәяси гәзите җитәкчеләренә рәхмәт хатлары тапшырылды.

Фитнес, аква-аэробика, скандинавия йөреше буенча тренерлар Светлана Чугункина белән Лилия Садовникованың исемнәре бик зур хөрмәт белән телгә алынды. Тамаша азагында чарада катнашучыларга бүләкләр тапшырылды.

Ася Кәбирова.