Уфада Илһам Шакировка багышланган симфоник поэманың премьерасы булды

Ильяс Камал – композитор, виолончелист, дирижер, Россия һәм Татарстанның Композиторлар берлеге әгъзасы, 2019 елдан – Кәрим Тинчурин исемендәге Татар дәүләт драма һәм комедия театрының баш дирижеры, халыкара бәйгеләр һәм Муса Җәлил премиясе лауреаты. Санкт-Петербургта туып үскән, Н.Җиһанов исемендәге Казан дәүләт консерваториясендә белем алган.

«Башкортстан – әти-әниемнең туган ягы, мин Башкортстанны үз Ватаным дип саныйм. Минем туганнарым Чакмагыш һәм Илеш районнарында яши, - дип хәбәр итте Ильяс Камал агентлыкка. – Илһам Шакиров белән беренче тапкыр балачагымда Петербургта очраштым. Әнием аның җырларын бик ярата иде».

Симфоник поэма партитурасында Илһам Шакиров репертуарындагы җырлар файдаланылган. Композитор сүзләренчә, «Кара урман» җыры эпиграф темасы һәм әсәрнең төп лейтмотивы булган.

Яңа музыкаль әсәрне баш дирижер, Башкортстан Республикасының атказанган артисты Дмитрий Крюков җитәкчелегендәге Башкортстан Милли симфоник оркестры Башкортстан һәм Татарстан композиторларының көйләреннән торган концерт кысаларында башкарды. Бу программа Татарстан һәм Удмуртия шәһәрләрендә гастрольләр туры концертларында яңгыраячак.

Татар-информ буенча.