Башкортстанны лаеклы күрсәтте

Русия Федерациясе Федераль Җыелышының Федерация Советы ярдәмендә Русия хатын-кызлары – эшкуарлары ассоциациясе тарафыннан уздырылган “Хатын-кыз – ел директоры” бөтенрусия конкурсында “Бәләбәй” алдан үсеш биләмәсе резиденты – ”Безнең икмәк” җәмгыяте директоры Диләрә Бәшарова җиңүче булды. Илнең төрле тарафларыннан хатын-кызлар катнашкан конкурс йомгаклары Мәскәүдә 22 мартта игълан ителде.

– Бу награда – бөтен безнең коллективның казанышларын тану. Без җирдә иң мәрхәмәтле эш – ипи пешерү белән шөгыльләнәбез. Эксперт комиссиясе әгъзалары алдында чыгыш ясап, мин икмәк турында шигырь укыдым. Чыннан да, икмәк – бар нәрсәдән өстен. Мондый колачлы чарада чыгыш ясау бик дулкынландырды, әмма туганнарның, коллективның, бөтен якташларның яклавы-хуплавы миңа Башкортстанны бөтенрусия дәрәҗәсендә лаеклы күрсәтергә көч һәм ышаныч бирде, – дип сөйләде Диләрә Мөхәррәм кызы.

“Безнең икмәк” җәмгыятен – “Бәләбәй хәбәрләре” газетасының даими партнерын чираттагы казанышы белән котлыйбыз! Яңа уңышлар сезгә!

Римма Солтанова.