Пилмән ясарга өйрәнделәр

Узган еллардагы сыман, быел да анда тәмле ризыклар әзерләү буенча осталык класслары уздырыла. Аны уздыруга  шәһәрдә билгеле аш-су остасы Тәслимә Ханнанованы чакыралар.

Узган якшәмбедә дә ул мәчет ашханәсендә балаларны пилмән ясау  серләренә төшендерде. Әйткәндәй, ризык әзерләү кызларга гына түгел, малайларга да кызык, бу юлы чарага гел  малайлар килгән.

 – Бу малайлар үсеп, өйләнгәч, хатыннарына үзләре сыйлар әзерләп ашатырлар әле, – диләр мөселман кардәшләр Света Андреева белән Илина Сәйфуллина.

Тәслимә ханым, без белгәнчә, камыр өчен су, йомырка, тоз, көнбагыш мае, әлбәттә, он ала. Малайлар тырышып-тырышып камыр бастылар һәм аны беразга каплап куйдылар.

 – Ә нигә шунда ук пилмән ясый башламыйбвыз? – дип сорый Әхәт Галиәхмәтов, Башка балалар –  Тухтаев Ильяс, Али белән Исмаил Амоновлар да шул сорауны бирәләр..

 – Камыр бер 15-20 минут ял итәргә, өлгерергә тиеш, – ди Тәслимә ханым.

Иң күңеллесе, дәрес беткәч, балалар  өлкәннәр пешереп биргән пилмән белән сыйландылар.

Аһ, үз кулларың белән ясаган пилмән бигрәк тәмле!

Зәйфә Салихова.

Автор фотосы.