КИҢӘШЛӘРГӘ КОЛАК САЛЫЙК!

Беренчедән, йокларга ятмагыз.

Ашаганнан соң йоклау –  ашказаны өчен бик начар гадәт. Организмга ризыкны вертикаль рәвештә эшкәртү уңайлырак. Кеше ятканда, ашкайнату процессы акрыная: бу эч кабару, кикерү кебек симптомнарга китерергә мөмкин. Шулай ук ашказаныннан ашказаны юлына ризыкның кире килүе, сару кайнау да булырга мөмкин.

Гадәттә, йоклар алдыннан ашаганнан соң ким дигәндә 30 минут көтәргә киңәш ителә.

Икенчедән, спорт, авыр физик эш белән шөгыльләнмәгез.

Азык организмны хәрәкәт өчен кирәкле энергия белән тәэмин итә. Ләкин ашаганнан соң физик активлык зыян китерергә мөмкин. Күнегүләр вакытында барлык көчләр ашказаны-эчәк тракты аша ризыкны алга җибәрүгә түгел, ә мускулларның эшенә сарыф ителә. Бу ашкайнатуны акрынайта һәм авырлык хисе тудырырга мөмкин.

Авыр физик эш яисә спорт белән ашаганнан соң бер-ике сәгатьтән соң һәм җиңелчә капкалап алганнан соң 30-60 минуттан соң шөгыльләнергә мөмкин.

Өченчедән, иелеп утырмагыз.

Ашаганнан соң иелеп нидер эшләргә ярамый, чөнки ашказаны кысыла, шуның аркасында аның эшчәнлеге бозыла. Бу аеруча рефлюкс белән авыручыларга кагыла. Аларга ашаганда һәм ашаганнан соң туры торырга, бөкрәеп йөрмәскә киңәш итәләр. Иелү, бөкрәеп утыру ашказанына басымны арттыра. Ә бу, үз чиратында, ризыкның ашказаны юлына кире килү ихтималын арттыра.

Дүртенчедән, салкын су эчмәгез.

Салкын су ашкайнатуга начар йогынты ясый. Ул кан тамырларын кыса һәм ашкайнатуны акрынайта. Организмның игътибары ашкайнатудан тән температурасын көйләүгә күчә. Шулай ук суык су майларның таркалуына комачаулый.

Салкын суны ашаганнан соң 30 минут узгач кына эчәргә мөмкин. Гомумән, ашаганнан соң, эчемлекләрдән тыелырга кирәк: шул вакытта ризык тизрәк эшкәртеләчәк.

Бишенчедән, эссе мунча кермәгез.

Ашаганнан соң шунда ук эссе мунчага бармагыз. Эш шунда, ашкайнату процессы күп энергия таләп итә. Кеше ашаганда, аның тән температурасы күтәрелә, чөнки органнарга кан килә. Су процедуралары вакытында кан, гадәттә, тирегә ашыга. Шуңа күрә ашаганнан соң душта коену яки мунча керү ашкайнату процессын боза.

Моннан тыш, кайнар мунча тән температурасын гына түгел, йөрәк тибешен дә тизләтә. Шуңа күрә тулы ашказаны белән мунча кергәндә, хәлегез начараерга мөмкин.

Автор:Юлия Төхбәтуллина

Чыганак: Сәламәтлек, киңәшләр