Нарат һәм каен үсентеләре утырттылар

 – 24 сентябрьдә Бәләбәй шәһәре биләмәсе хакимияте, "Төзекләндерү" учреждениесе,  «Бәләбәй хәбәрләре» газетасы редакциясе хезмәткәрләре , «Өсән» паркында һәм «Борынгы кала» үзәгендә нарат һәм каен үсентеләре утырттылар. Акциядә шулай ук шәһәр биләмәсе Советы депутаты, эшмәкәр Александр Медведев катнашты, – дип сөйләде шәһәр биләмәсе хакимияте  башлыгы вазыйфаларын башкаручы Татьяна Зубова.

- Өмәдә катнашучыларның барысының да кәефе кичәге сентябрь көне кебек кояшлы, җылы иде. Мин яраткан шәһәремне яшелләндерүгә үз өлешемне кертүемнән бик зур канәгатьлек хисе кичердем, - дип уртаклашты хис-кичерешләре белән «БХ» фотохәбәрчесе Елена Петрова.

27 сентябрь «Яшел Башкортстан» акциясенең төп көне  булачак. Бу көнне муниципаль район  хакимияте хезмәткәрләре Бәләбәй шәһәренең 2 нче мәктәбе янына агачлар утыртачаклар. Экологик чарада районның авыл биләмәләре халкы да катнаша.

БР торак-коммуналь хуҗалык министрлыгы мәгълүматлары буенча, өмәләр вакытында 4 меңнән артык  зур агач һәм 40 меңнән артык үсенте утырту, 40 яңа тематик аллея булдыру планлаштырыла.

 Римма Солтанова. Елена Петрова фотолары