Кышны озату – коймак бәйрәме күңелләрне күтәрде!

Мәйдан иртәдән үк яңгыратып көлү тавышлары, яңа пешкән тәбикмәк исе һәм күңел ачу хисе белән тулды. Катнашучылар хисапсыз  иде, һәм һәркем үзе белән әллә күпме җылы һәм шатлык алып килде. Халәт чын-чынлап ялкынлы булды, олысын-кечесен бергә берләштерде.

“ Миләшкәй” балалар бакчасы коллективы беренчеләрдән булып фестивальдә катнашуга гариза бирде һәм энтузиазм белән әзерләнергә тотынды. Болар: сценарийны төзүче  –  Л.С.Миңнегалиева, алып баручы - О. В. Романова, «Кыш» - И. М. Гыймаева, «Яз» - Н. А. Шәңгәрәева, “Масленица” - Т.А. Сергеева, дулкын өчен җаваплылар - М.Е. Озерова, Л. О. Никитина, Е. В. Силова, коймак өчен җаваплылар - Н. В. Мишутина, Г. Ш. Әхмәтшина.

Һәм  менә сценарий әзер, репетицияләр артта калды, артистлар инде сәхнәдә, тамашачыларга онытылмаслык хис-кичерешләр бүләк итәргә әзер!

Бәйрәмнең башлануы алып баручының пәйда булуы белән истә калды, ул беренче сүзеннән үк җыелганнарның йөрәген яулап алды. Ул барысына да бу бәйрәмнең тирән мәгънәсен аңлатты – бу салкыннар белән саубуллашу гына түгел, ә татулашу, үпкәләрне кичерү һәм күңелне яңарту вакыты да.

"Масленица – тәбикмәк  һәм җырлар белән. Русиядә барлык халыкларның бәйрәме ул, чөнки без бердәм. Шулай булгач, барысын да гафу итегез, һәм сез дә гафу ителерсез. Шаулап-гөрләп торыйк –  Масленица белән бергә бөтен кешегә шатлык булсын өчен әйдәгез  дулкын ясыйк!" –  дип чакырды алып баручы, һәм мәйдан җавап итеп алкышлар, шатлыклы тавышлар белән тулды.

Ә тәбикмәксез  нинди бәйрәм булсын! Бу сүзләр ишетелүгә, сәхнәгә чибәр кызлар чыкты,  алар, язгы инеш сыман, тамашачылар янына төшеп кызарып пешкән, хуш исле тәбикмәк тараттылар.  Май, каймак, уылдык белән – һәркем үзе ошаган  тәмле ризыктан шулай авыз итте.

Чара бер сулышта –  бик күңелле узды. Җырлар, биюләр, уеннар, конкурслар – һәркем үзенә ошаган шөгыль тапты. Үзәк мәдәният йорты каршындагы мәйдан бу көнне төрле яшьтәге һәм төрле һөнәр ияләрен язны көтү шатлыгы белән берләштерү үзәгенә әйләнде.

Надежда Кривоносова-Петрова

Кривоносова Н. С. фотолары

.