Бәләбәйдә яшьләр чишмәне тазартырга чыктылар

Район ветераннар оешмасы рәисе Александр Буйлов «БИ " редакциясенә менә шундый  хәбәр җиткерде:

 – Актив яшьләрнең безнең чакыруны хуплап, экологик өмәгә чыгулары бик күңелле.  "Кече Ватан чисталыгы өчен – бердәм фронт белән!" –  менә шундый лозунг белән алар яхшы эш башладылар.

Ветераннар советы активистларына Бәләбәй медицина көллиятенең студентлар советы һәм Бәләбәй районы яшьләр хакимияте кушылды.Без бергәләп М.Б. Шапошников урамындагы чишмәне тазарттык. Өмәнең нәтиҗәсе: 20 капчык чүп-чар һәм чылтырап агучы чиста чишмә.…

Эштән курыкмаган һәм үз вакытын уртак эшкә багышлаган һәркемгә рәхмәт! Бәләбәебез чистарсын һәм ямьләнсен. Мондый акцияләр – безнең бергә көч булуыбызның ачык дәлиле! –  дип ассызыклады Александр Сергеевич.

Туган җиргә мәхәббәт игелекле эшләрдән, күренекле якташлар исемен йөртүче урамнарда чисталыктан һәм тәртиптән башлана.

Любовь Иванова әзерләде. Фото А. Буйловтан.