Бәләбәй пенсионеры мошенниклар аркасында 7,3 млн сумнан артык акчасын югалткан

Пенсионерга үзен Пенсия фонды хезмәткәре дип таныштырган кеше шалтыраткан. Ул ир-атны ашыгыч рәвештә пенсияләрне яңадан исәпләү таләп ителүенә ышандыра. Бу фиктив процедура кысаларында ялган хезмәткәр СМС-хәбәрдән кодын әйтеп бирүен сорый- – һәм зыян күрүче аның үтенечен үтәгән.

Бу алдау чылбырында беренче адым булды. Тиздән өлкән кешегә башка мошенниклардан шалтыратулар килә башлый  –  бу юлы алар үзләрен полиция хезмәткәрләре итеп күрсәтәләр. Аферистлар яңа сценарий уйныйлар: алар пенсионерны банк акчаларының куркыныч астында булуына ышандыралар. Акчаны "коткару” өчен алар аларны “куркынычсыз счетка" күчерергә киңәш иткәннәр. Операцияне башкару өчен мошенниклар  акчаны китереп бирүне  оештырганнар – аларны курьерга тапшырырга кирәк булган. Беркатлы ир кеше  бу күрсәтмәләрне үтәгән һәм нәтиҗәдә 7,3 миллион сумнан артык колак каккан.

Шунсы игътибарга лаек, хәл акчаларны алу этабында ук башка борылыш ала ала иде. Пенсионер банкта зур сумма алганда, финанс оешмасы хезмәткәрләре аңа мондый акчаларның нинди максатлар өчен кирәк булуы белән кызыксынганнар. Ир кеше башка банкта акчасын отышлырак процент белән урнаштырырга ниятләвен әйткән.  Бу җавап банк хезмәткәрләрендә шик уятмаган, һәм операция үткәрелгән.

Башкортстан Республикасы буенча Эчке эшләр министрлыгы кисәтә: банкның, Пенсия фондының яки полициянең чын хезмәткәрләре беркайчан да СМСтан код сорап шалтыратмыйлар, акчаны “имин счетка” күчерүләрен яки курьерга тапшыруларын сорамыйлар. Моны ишеткәч, шунда ук трубканы куегыз һәм үзегезнең картада яки дәүләт органы сайтында күрсәтелгән рәсми номер буенча оешмага шалтыратыгыз. Хәтта әңгәмәдәшегез сезне исемегез һәм атагызның исеме белән атаса да, хәбәрләрдән кодларны беркемгә дә хәбәр итмәгез. Бу мәгълүматны өлкән яшьтәге туганнарыгызга җиткерегез  – алар хәвеф төркемендә.

Елена Петрова Фотосы

 Регина Иванова әзерләде