Бәләбәй – Башкортстан энҗеләренең берсе

– Торак пунктларны төзекләндерү өчен бюджет һәм бюджеттан тыш акчалар җәлеп итү буенча барлык ресурслардан файдаланабыз,  –  диде Азат Альверт улы. –  Мәсьәләләрне хәл итүгә үз халкыбызны да җәлеп итәбез. Мәсәлән, 2016 елдан башлап урындагы башлагычларга ярдәм программасында катнашабыз –  гомуми суммасы 100 млн сумга якын 77 проектны гамәлгә ашырдык.

Бәләбәй районы «Уңайлы шәһәр мохите булдыру» (36 җәмәгать киңлеге төзекләндерелгән), «Башкорт ихаталары» (31 территория тәртипкә китерелгән) федераль һәм республика программаларында, шулай ук «Атайсал», «Реаль эшләр», «Авыл территорияләрен комплекслы үстерү»проектларында актив катнаша.

 – Бәләбәй шәһәрләрдә һәм тарихи биләмәләрдә уңайлы шәһәр мохите булдыру буенча Бөтенрусия конкурсында Бәләбәй өч тапкыр җиңүче булды. 2020 елда «Җырчы чишмәләр» колачлы проектын гамәлгә ашырдык, 2023 елда – Төрмә замогы кварталын төзекләндердек, 2025 елда – Новаторлар бульварын яңарта башладык, – дип өстәде муниципалитет башлыгы. – Юнәлтелгән акчаларның гомуми күләме 573 млн сум тәшкил итте, шуның яртысы – федераль финанслау. Планда – Бөек Екатерина чорындагы төрмә замогын реконструкцияләү.

«Яшел Башкортстан» республика экология акциясе кысаларында соңгы җиде елда Бәләбәй районында алты тематик аллея булдырылды һәм 18 меңгә якын үсенте, шул исәптән 5 мең зур агачлар утыртылды.

Шәһәр паркларын һәм җәмәгать урыннарын карап тоту белән муниципаль бюджет учреждениеләре һәм идарәче компанияләр шөгыльләнә. Район балансында – 60 берәмлектән артык коммуналь техника.

Махсус контрольдә – урамнарны яктырту мәсьәләләре. 2019 елдан башлап муниципалитетта ут диодлы лампалар саны сигез тапкырга артты.

Башкортстан башлыгы муниципалитетның идарә итү командасына нәтиҗәле эшләре өчен рәхмәт белдерде.

 – Муниципалитет күзгә күренеп, җитди үзгәрде. Тагын шөгыльләнер нәрсәләр барлыгы аңлашыла. Башланган проектларны төгәлләгез һәм яңалары турында уйлагыз,  – дип ассызыклады Радий Хәбиров.  – Тулаем алганда, төзекләндерү буенча бик күп программалар бар, аларда реаль акча алырга һәм үз территорияләреңне үзгәртергә мөмкин. Барысы да муниципалитет башлыгының бу темага ни дәрәҗәдә актив катнашуына бәйле. Бәләбәйгә чәчәк атуын, ә халкына уңайлы шартлар телим,  –  дип теләде төбәк башлыгы.

Радий Хәбиров муниципалитетта бренд чараларын уздыруның мөһимлеген ассызыклады. Бәләбәй районында ел саен Халыкара Аксаков бәйрәме уздырыла.

Республика җитәкчесе шулай ук төбәкнең мәдәният һәм туризм министрлыгына рус шагыйрәсе Марина Цветаеваны хөрмәт итүчеләр өчен Өсән-Ивановка авылында «Цветаева учагы » әдәби фестивален популярлаштыру мәсьәләсен эшләргә кушты.

Светлана Шириня әзерләде

БР Башлыгы матбугат хезмәте фотолары