Су хаталарны гафу итми

Бәла-казалар еш кына су коену тыелган урыннарда була. Кешеләр «үзләренең» тын почмагын сайлыйлар, ләкин андый урыннарда яшерен агымнар булуын, тирәнлекнең кискен төшеп китүен, су астында агач тамырлары һәм ташлар яшеренгәнен уйлап та карамыйлар. Еш кына эчкелек фаҗигагә китерә: ул курку тойгысын киметә һәм кешене үз көчен аек бәяләү сәләтеннән мәхрүм итә. Тагын бер куркыныч закончалык - балалар су янында күзәтүсез. Кайчак төзәтеп булмаслык хәл булсын өчен санаулы минутлар да җитә.

Гадәттән тыш хәлләр министрлыгы хезмәткәрләре, коткаручылар һәм инспекторлар  бәла-казаны киметү өчен кулдан килгәннең барысын да эшлиләр: район сулыкларында даими рейдлар үткәрәләр, белешмәләр өләшәләр, хәвефсезлек  кагыйдәләрен искә төшерәләр. Ләкин бернинди тикшерүләр һәм патрульләр безнең һәрберебезнең шәхси җаваплылыгын алыштыра алмый. Суда хәвефсезлек – ул барыннан да элек аңлы сайлау.

Сулыкка җыенганда нәрсәне истә тотарга кирәк?

* Коену өчен рәсми пляжларны гына сайлагыз – коткаручылар һәм җиһазландырылган зона булган урыннарны.

• Исерек хәлдә суга кермәгез. Суда теләсә нинди хата һәлакәтле булырга мөмкин.

* Балалардан күзегезне алмагыз. Бала суда нык торса да, ул гел олы кешенең күз алдында булырга тиеш.

 Таныш булмаган урыннарда чумудан сакланыгыз. Өстән шадра кебек тоелган әйбер су астында җитди киртә булырга мөмкин.

• Әгәр сез кеше батуына шаһит булсагыз, шунда ук ярдәмгә чакырыгыз һәм 112 номерына шалтыратыгыз. Махсус әзерлегегез булмаса, аны үзегез генә коткарып калырга тырышмагыз: паникага бирелеп үзеңне дә, зыян күрүчене дә куркыныч астына куярга мөмкин.

Ата-аналар игътибарына!. Ялга киткәнче балалар белән сөйләшегез. Ни өчен рөхсәтсез суга керергә, таныш булмаган урыннарда чумарга, яр буенда шаярырга ярамый икәнен аңлатыгыз. Вакытында әйтелгән гади сүзләр бервакыт гомерне саклап калырга мөмкин.

Регина Иванова әзерләде