Мөһим үзгәрешләр: 1 июльдән автомобильчеләрне нәрсә көтә

Исегезгә төшерәбез, 2022-2025 елларда гамәлдә булган автоматик озайту чарасы башка кулланылмый. Таныклыкның гамәлдә булу вакыты беткән автомобильчеләргә аны алыштыру турында мөстәкыйль кайгыртырга кирәк. Моның өчен «Госуслуги» порталы аша гариза бирергә, ГАИ бүлекчәсенә мөрәҗәгать итәргә яки МФЦга килергә мөмкин. Документлар пакетына паспорт, медицина бәяләмәсе, гариза һәм дәүләт пошлинасын түләү турында квитанция керә. ДАИга шәхси визит вакытында хокукларны еш кына шул ук көнне рәсмиләштерәләр, МФЦ аша процедура күбрәк вакыт ала, ә онлайн-заявка вакытында әзер документ артыннан килергә генә кала. Вакыты чыккан таныклык белән автомобиль йөртү тыела – моның өчен 5 меңнән 15 мең сумга кадәр штраф яный.

Үзгәрешләр автокредитлау өлкәсенә дә кагылачак: 1 июльдән банклар заемщикларның керемнәрен бәяләүгә Русия Банкы билгеләгән яңа алымнар кулланачак. Рәсми рәвештә расланган керем чыганакларына басым ясаячаклар, ә расланмаган мәгълүматларны дисконт белән исәпкә алачаклар. Бу кайбер категория гражданнар өчен автокредит алуны катлауландырырга мөмкин.

Тагын бер яңалык шиннарны маркировкалау белән бәйле: 6 июльдән Русиядә җитештерүне раслауның яңа механизмы эшли башлаячак. Тикшерү фото - һәм видеоматериаллар кулланып маркировка системасы аша узачак, ә кирәк булганда – өстәмә мониторинг белән. Әгәр производствоны раслап булмаса, маркировка кодларын бирүдән баш тартырга мөмкиннәр

Моннан тыш, чит илдән автомобильләр кертүгә таможняның караш үзгәрә. Югары суд аңлатканча, машина бәясе турындагы бәхәстә таможня интернет-аукцион мәгълүматларына гына таянырга хокуклы түгел – аңа бәяләрне киметүне исбатларга туры киләчәк. Әгәр документларда каршылыклар ачыкланса, автомобиль бәясен яңадан карарга мөмкиннәр. Сатып алучыларга кәгазьләр комплектына һәм бәяләрне нигезләүгә игътибарлырак булырга кирәк.

Шул ук вакытта, Дәүләт автоинспекциясе хәбәр иткәнчә, 1 июльдән автомобильчеләр өчен яңа штрафлар кертелми – машина йөртүчеләргә элеккечә закон нормаларына йөз тотарга кирәк.

Регина Иванова әзерләде