+15 °С
Дождь
Җәмгыять
18 Июля , 12:00
«Татар кызы-2026»ның Башкортстан финалы узды! Җиңүче — Гөлназ Кашаева!
15 июльдә Уфаның Арт-квадрат үзәгендә «Татар кызы» матурлык һәм сәләт бәйгесенең төбәк этабы финалы гөрләп үтте. Тамаша залында милләттәшләребез, кунаклар һәм абруйлы жюри әгъзалары алдында 4 сәләтле кыз үз осталыгын күрсәтте: видеовизитка, иҗади чыгыш, интеллектуаль батл һәм токмач кисү буенча кулинар ярышта сынаштылар.
«Татар кызы-2026»ның Башкортстан финалы узды! Җиңүче — Гөлназ Кашаева!
Барлык сынауларны үтеп, жюри карары буенча иң югары баллны Гөлназ Кашаева (Тәтешле районы, Шулган авылы) җыйды. Гөлназ 23 яшендә, укытучы, балалар бәйрәмнәрен оештыручы, спортчы һәм биюче. Аның шигаре: «Башкалар өчен кояш булып, үзеңә дә ихлас балкы».
Хәзер Гөлназны алга таба зур адым көтә — август аенда Казанда узачак Халыкара «Татар кызы-2026» ярымфиналында Башкортстан Республикасын тәкъдим итәчәк. Уңышлар сиңа, Гөлназ!
Финалист кызларыбызга — Ильмира Шәрәфетдинова, Адилә Тимербаева, Дарина Ергизовага — көчле чыгышлары, матурлыклары һәм талантлары өчен зур итеп рәхмәт әйтәбез. Сез — милләтебезнең йөзек кашы! Чараның оештыручылары — «Татарча фатирник | Аулак өй» Уфа татар яшьләренең иҗтимагый оешмасы, Бөтендөнья татар конгрессы һәм аның Башкортстандагы вәкиллеге. Бәйрәмгә матурлык өстәп, финалист кызларга истәлекле бүләкләр өләшкән иганәчеләрне дә әйтеп үтәсе килә: «Голоса» вокал мәктәбе, «Бәхетле кеше», «Матур бүләк», «ШАТФЛЮ» бизәнү әйберләре брендлары, «Бертуган» хәйрия оешмасы, Эльнара Уразметова бренды, «Бәрәкәт» кафесы.
Бөтендөнья татар конгрессының Башкортстандагы вәкиллеге
Фотолар - Рәсүл Ташбулатов.
«Татар кызы-2026»ның Башкортстан финалы узды! Җиңүче — Гөлназ Кашаева!
