Башкортстан – иң яхшы унлыкта

2025 ел нәтиҗәләре буенча Башкортстан Стратегик инициативалар агентлыгы (АСИ) тормыш сыйфаты милли рейтингында 9 нчы урынны алды. Биш ел эчендә төбәк тәэсирле ыргылыш ясады - 40 нчы юлдан беренче унлыкка күтәрелде.

АСИ рейтингы 12 юнәлештә 149 күрсәткеч буенча төзелә һәм статистика һәм геоаналитиканы гына түгел, ә халыкның үз фикерен дә исәпкә ала. Быел методологияне яңарттылар: белешмәләрне Русия үсешенең милли максатлары һәм төбәк башлыкларының нәтиҗәлелегенең төп параметрлары белән бәйләделәр.

Республиканың иң көчле нәтиҗәләренең берсе - «Социаль яклау»юнәлеше буенча 5 нче урын. Экспертлар халыкның социаль ярдәм, социаль контрактлар һәм акчалата түләүләр белән канәгатьлеген, шулай ук социаль хезмәтләр хезмәткәрләренә ярдәмнең нәтиҗәлелеген һәм мөнәсәбәтен югары бәяләделәр. Инвалидлар һәм аз хәрәкәтчән гражданнар өчен мәшгульлеккә дәүләт ярдәме хезмәтләреннән файдалану мөмкинлеге аерым билгеләп үтелде.

Социомәдәни блок та югары бәя алды. Башкортстан ачык спорт объектларына керү мөмкинлеге, музейларга һәм мәдәни-ял итү учреждениеләренә барудан канәгатьлек, шулай ук иҗатка тартылу – түгәрәк һәм студияләрдә шөгыльләнү буенча лидерлар рәтенә керде. Җәмгыятьнең сәламәтлек мөмкинлеге чикле кешеләргә, күп балалы гаиләләргә һәм йөкле хатын-кызларга карата мәрхәмәтле булуы да мөһим күрсәткеч булды.

Рейтингта махсус операциядә катнашучыларга һәм аларның гаиләләренә ярдәм итүгә аерым игътибар бирделәр - бу күрсәткечне тикшеренүгә беренче тапкыр керттеләр. Республикада 60 ярдәм чарасы гамәлдә: алар социаль ярдәмне, медицина һәм социаль тернәкләндерүне, укытуны һәм эшкә урнаштыруны үз эченә ала. БР башлыгы Радий Хәбиров ассызыклаганча, төбәктә комплекслы ярдәм системасы төзелә: "Узган ел СВО катнашучыларына һәм аларның гаиләләренә ярдәм итү кысаларында без ярдәм системасын киңәйттек...  Тулаем алганда барлык юнәлешләр буенча системалы эш булдырдык, беренче чиратта медицина һәм социаль тернәкләндерү, эшкә урнашуга ярдәм итү".

Экспертлар шулай ук Башкортстанның башка төбәкләр үзләштергән берничә тәҗрибәсен билгеләде. Алар арасында - «Берлога» милли киберфизик платформасы, ул укучыларны технологик белем бирүгә видеоуеннар аша җәлеп итә (аны илнең 18 субъектында кертәләр), инвестиция мәйданчыклары буенча виртуаль турлар (дүрт регионда кулланыла) һәм юл буе сервисын системалы үстерү.

Политологлар республиканың югары позицияләрен халык үзләре сизгән тотрыклы үзгәрешләр белән бәйли. Сәясәт фәннәре кандидаты, РФ Хөкүмәте каршындагы Финуниверситет доценты Иван Пятибратов Башкортстанның топ-10га эләгүен күрсәткеч нәтиҗә дип атады: "Без Русиядә тормыш сыйфатында зур прогресс күзәтәбез. Шул ук вакытта сораштырылучылар тулаем алганда төбәкләрдә һәм тулаем илдә үз тормышларыннан күпкә канәгать. Һәм бу җәһәттән, әлбәттә, үзләре өчен СВОның төп максат булуын билгеләгән төбәкләр, шул исәптән Башкортостан да, бу җиңүне якынайтуга сүз белән түгел, ә эш белән омтылуларын күрсәтә".

БАГСУ укытучысы Игорь Зөбәйдуллин республиканың алга баруы реаль динамиканы чагылдыра дип өстәде: "Башкортостан ышанычлы рәвештә өскә хәрәкәт итә. Бу җитди үзгәреш, ул тотрыклы уңай динамиканы чагылдыра: 2021 елда республика 40 нчы урында иде. Башкортстанның беренче унлыкка эләгүе – тормыш сыйфатын күтәрү буенча эшнең системалы нәтиҗә бирүен күрсәтә".

Регина Иванова әзерләде. Фото: Олег Яровиков