Колак һәм борын әдәпләре

Кешеләрнең яшерен сүзләрен тыңлап тормагыз, яшерен сүзләрне тыңлаучылардан һичкемнең күңеле риза булмас. Сүз йөртүчеләр һәм гайбәт сөйләүчеләрне тыңламагыз. Аларга бу эшләрнең гөнаһ икәнлеген әдәп белән генә аңлатыгыз, үзегездән кече булсалар, йомшаклык белән генә тыегыз.

Ишеткән сүзләрнең фетнәгә сәбәп була торганнарын һичкемгә сөйләмәгез. Әдәпсез урыннарга барып, гөнаһка төшерүче уен тавышларын тыңламагыз. Йөзегезне юганда колакларыгызны да юыгыз. Бик зур һәм авыр алкалар асып колакларыгызны бозмагыз яки бөтенләй кимәгез. "Тәхкыйкъ, колак, күз һәм йөрәк – барысы өчен дә сорау алыначак", – дигән Аллаһ Тәгалә.

Төчкергән вакытта йөзегезне читкә борыгыз һәм соңыннан авызыгызны су белән юыгыз.

– Төчкергән кеше: "Әлхәмдү лилләһ" (бөтен мактау Аллаһ Тәгаләгә!), ә иптәше аңа: "Йәрхәмүкәллаһ" (Аллаһ сиңа рәхмәт кылсын!), – дисен. Төчкерүче иптәшенә: "Йәһдикүмүлаһү вә йүсълиһ бәләкүм" (Аллаһ Тәгалә сине туры юлга күндерсен һәм барча эшләреңне төзәтсен!), – диеп җавап бирсен, – дип әйткән Пәйгамбәребез Мөхәммәд галәйһиссәләм.
Ризаэтдин Фәхретдин мирасыннан.